Fljótlegt hvítlauksrækju spagettí

Þessi réttur er þægilegur kvöldmatur fyrir þau kvöld sem maður nennir ekki að hafa mikið fyrir kvöldmatnum. Hráefnin eru fá en samt er mikið og gott bragð af réttinum. Ég vil helst hafa ferska papriku, kirsuberjatómata og avakadó með en það voru þó ekki allir sammála mér og fannst þetta standa vel eitt og sér. Ólívuolía útá er hins vegar algjör nauðsyn. Uppskriftin er fyrir um það bil 5 manns.

Hráefni

1 laukur

3 hvítlaukar (litlir, heilir sem eru ekki með rifum annars 6-7 hvítlauksrif ca)

1 msk smjör

400 gr íslenskar rækjur

400 gr risa rækjur (ósoðnar)

2 tsk basilika

1 tsk oregano (má sleppa)

Spagettí (ég nota gróft spelt spagettí eða glúteinlaust pasta)

Aðferð

1. Byrjið á því að sjóða vatn í potti sem spagettíið fer útí

2. Hitið pönnu með smjöri og olíu og skerið laukinn á meðan

3. Steikið laukinn í 2 mín og kremjið því næst hvítlaukinn útá. Þegar laukurinn er orðinn mjúkur setjið kryddin útá og risa rækjurnar. Passið að rækjurnar séu afþýddar og verið búin að hella vökvanum af. Saltið og piprið eftir smekk.

4. Þegar risarækjurnar eru nánast steiktar bætið litlu rækjunum útí.

5. Blandið að lokum öllu saman við spagettíið og njótið með ólívuolíu.