• Elísabet Jónsdóttir

Einfalt og fljótlegt pasta með heimagerðri tómatsósu

Ég hendi oft í fljótlega rétti með því sem til er í ísskápnum frekar en að fara út og kaupa mér einhvern skyndibita, bæði finnst mér það í flestum tilfellum bragðast betur og svo finnst mér fínt að spara peninginn. Réttirnir eru oft einfaldir en ég mun þó eflaust henda nokkrum uppskriftum inn smá saman þar sem stundum er gott að grípa í svoleiðis uppskriftir þegar maður er hugmyndalaus sjálfur.

Í þetta skiptið var ég að elda fyrir mig og litlu systur mína og langaði í eitthvað frekar ferskt og var ekki í stuði fyrir hina klassísku mexikóostasósu. Ég notaði einungis ferska tómata í sósuna þar sem ég þurfti ekki að gera mikið af henni fyrir okkur tvær. Ef stækka á uppskriftina má nota tómata úr dós með eða í staðin fyrir ferska. Ég myndi mæla með að nota kirsuberjatómatana með þeim stóru þar sem þeir koma með skemmtilegt bragð í sósuna, aðeins sætara. Mér finnst einnig paprika lang best fersk svo ég skellti henni ofaná ásamt fetaostinum en heima hjá mér er sjaldnast máltíð án fetaosts.


Hráefni


  • Laukur 1 stk

  • Stór tómatur 1 stk

  • Kirsuberjatómatar 6 stk

  • Rautt pestó 1 1/2 tsk

  • Vatn 1/3 dL

  • Skinka og paprika eftir smekk

  • Fetaostur

  • Pasta


Aðferð


  1. Saxið laukinn smátt niður og steikið á pönnu þar til hann verður glær

  2. Skerið tómatana niður í litla bita og bætið á pönnuna

  3. Hellið vatni yfir og látið malla

  4. Þegar tómatarnir eru orðnir mjúkir í sósunni má bæta pestóinu útí

  5. Smakkið sósuna til og saltið og piprið eftir smekk

  6. Hellið sósunni yfir pastað og steikið skinkuna því næst á pönnunni og parikuna ef þið viljið hafa hana steikta frekar

  7. Blandið saman við pastað og sósuna og skellið fetaosti yfir





  • Facebook