• Elísabet Jónsdóttir

Hunangsgljáður lax sem slær í gegn

Updated: Feb 10, 2019


Ég var að sýna pabba um daginn hvað ég gerði á Instagram sem er yfirleitt að skoða matarmyndbönd. Þar rákumst við saman á myndband af svo girnilegum laxi að við urðum að prófa að gera hann sjálf. Við gerðum hann í matarboði og þetta gjörsamlega sló í gegn, svo mikið að einn gesturinn tók mynd af fiskinum til að minna sig á að elda hann sjálfur seinna. Ég tók mið af uppskriftinni af síðunnni Cafe delitos en þurfti aðeins að útfæra hana svo hún hentaði okkur betur. Þetta eru ekki mörg hráefni og tiltölulega fljótlegt í undirbúningi og eldun en hins vegar þarf fulla einbeitingu þegar verið er að elda þar sem þetta gerist hratt. Gott er því að vera búinn að græja bæði sósu og annað meðlæti fyrirfram. Mikilvægt er að vera með þykka og góða bita svo þeir ofeldist ekki. Við skárum sporðinn og þunnildinn af til að vera með jafn stóra bita sem myndu eldast jafnt. Þunnildin og sporðinn skárum við niður og borðuðum með soya sósu og teryaki (sasimi). Það er mikilvægt að bitarnir séu ekki eldaðir of lengi, þá verða þeir þurrir og ekki eins góðir. Því er gott að nota hitamæli ef hann er til en annars fylgjast vel með og hafa fiskinn þá frekar styttra inní ofni, þar sem hann heldur einnig áfram að eldast eftir að hann er tekinn út.


Hráefni

  • 6 bitar af laxi (við skárum niður flak)

  • 6 msk hunang

  • 100 gr smjör

  • 3-4 hvítlauksrif

  • 1/3 ferskt chilli

  • 2 ferskar sítrónur

Aðferð

  1. Forhitið ofninn á 180°

  2. Byrjið á að kreista sítrónu í skál og kremjið hvítlauk útí.

  3. Fræhreinsið chilli og skerið smátt. Bætið síðan útí sítrónusafa úr einni sítrónu

  4. Mælið hunang í aðra skál og hafið allt tilbúið við hliðina á pönnunni og skerið hina sítrónuna í sneiðar.

  5. Hafið eldfast mót tilbúið til að setja bitana í eftir steikingu

  6. Setjið smjörið á pönnuna á háan hita. Hrærið þar til það hefur bráðnað og leyfið síðan að malla þar til það er orðið gullinbrúnt. Hrærið stöku sinnum á meðan.

  7. Hellið hunanginu útí þegar smjörið er tilbúið og því næst sítrónublöndunni. Hrærið saman og leyfið að malla í nokkrar mínútur.

  8. Setjið laxabitana á pönnuna. Setjið um það bil hálfa niðurskorna sítrónu á pönnuna með. Hafið bitana í stutta stund þar til gljái hefur myndast. Notist við skeið og setjið gljáa á bitana á meðan þeir eru að brúnast. Athugið að laxinn á ennþá að vera sjáanlega hrár á hliðunum þegar hann fer inní ofn.

  9. Færið bitana yfir í eldfasta mótið og hellið gljáanum af pönnunni yfir. Setjið inní ofn þar til laxinn hefur náð 50°. (Eða í svona 7-10 mín).





  • Facebook