• Baldur Sverrisson

Kókosmöndlukaka (glútenlaus)

Þegar ég kaupi eitthvað sem ég er ekki vanur að kaupa þá verð ég bara að nota það, þessvegna á ég t.d. aldrei afgang af nammi daginn eftir. Hráefnið sem ég á núna er kókoshveiti og ég hef ekki getað hætt að láta mér detta í hug uppskriftir til að nota það. Ég gerði meðal annars orkukúlur (uppskrift kemur fljótlega) og ég átti hveitið að sjálfsögðu til til að gera glútenlausa súkkulaðiköku sem sló í gegn um daginn. Ég var hins vegar ekki 100% sannfærður um að ég væri á réttri leið með þessa köku þannig ég ákvað að nota samstarfsmenn mína sem tilraunadýr á starfsdegi. Þeirra dómur var einróma um að þessi kaka væri frábær og því hef ég engar áhuggjur með að deila henni með ykkur. Svo er kakan að sjálfsögðu glútenlaus sem er alls ekki verra


Hráefni

2 kökur

  • Smjör við stofuhita 1 bolli

  • Púðursykur 1 bolli

  • Sykur 1 bolli

  • Sítrónudropar 1/2 tappi

  • Egg 5 stk

  • Kókoshveiti 1 bolli

  • Möndlumjöl 1 bolli

  • Matarsódi 1 tsk

  • Lyftiduft 1/2 tsk

  • Salt klípa

  • Kókosmjólk 2 bollar (má nota aðra mjólk ef ykkur finnst það betra)

Krem

  • Eggjarauður 5 stk

  • Flórsykur 100 g

  • Súkkulaði 200 g

  • Smjör 100 g

Aðferð

Kakan

  1. Þeytið saman smjör, sykur og sítrónu þar til blandan verður létt og ljós

  2. Blandið eggjunum saman við smjörblönduna, einu í einu og hrærið vel á milli

  3. Blandið þurrefnunum og mjólkinni saman við blönduna með sleikju

  4. Setjið í 2x 20-25 cm form

  5. Setjið inní forhitaðan ofn á 200°C og blástur í 35 mínútur eða þar til þið stingið prjón í kökuna og hann kemur hreinn út

Kremið

  1. Bræðið saman súkkulaðið og smjörið

  2. Þeytið eggjarauður og flórsykur þar til blandan verður þykk og hvítleit

  3. Stillið hrærivélina á hægustu stillingu og bætið súkkulaðiblöndunni saman við

  4. Hellið yfir kökurnar þegar þær hafa kólnað. Helming yfir hvora, það má líka gera tveggja hæða köku úr þessu og stetja þá krem yfir og á milli

  5. Skreytið kökuna með kókosflögum og berið fram, gott getur verið að geyma kökuna í ísskáp yfir nótt



  • Facebook