Vinsælasta pizzan á heimilinu

Fjölskyldan mín hefur lengi verið með vikulegt pizzakvöld. Áleggin hafa orðið fjölbreyttari eftir því sem við systurnar þrjár urðum eldri og fyrir einhverjum árum byrjaði mamma að gera það sem við köllum núna grænmetispizzu. Hvaðan hugmyndin kom veit ég ekki en núna er ekki pizzakvöld án grænmetispizzunnar, og það liggur við að slegist sé um sneiðarnar, þá sérstaklega eftir að við byrjuðum að gera súrdeigsbotn sem fer auðvitað mun betur í magann sem þýðir að meira er hægt að borða af henni. Við setjum grænmetið í sitthvorar skálarnar þar sem hver og einn getur þá valið það sem honum finnst best en allir eru þó sammála um að einhversskonar kál, fetaostur og kasjúhnetur sé nauðsynlegt með.

Hráefni

• Pizzadeig í eina pizzu t.d. súrdeigspizza

• Grænt pestó eftir smekk

• Skinka eftir smekk

• Ostur eftir smekk

Niðurskorið grænmeti ofaná pizzu

• Kál

• Gúrka

• Paprika

• Tómatar (við notum vanalega kokteiltómata)

• Annað grænmeti eftir smekk

• Fetaostur

• Kasjúhnetur

Aðferð

1. Fletjið degið út á plötu

2. Smyrjið pestó á botnin líkt og það væri pizzasósa

3. Næst setjið þið skinkuna og ostinn ofaná eins og þið mynduð gera ef þetta væri venjuleg pizza

4. Bakið þar til botninn er tilbúinn

5. Skerið grænmetið niður og setjið ofaná ykkar sneið eftir smekk ásamt fetaosti og kasjúhnetum