Dásamleg nautaloka

Þessi uppskrift varð til eiginlega alveg óvart. Ég hef verið að kenna matreiðslu í fjarnámi þetta haustið og ég hef alltaf sýnt nemendum mínum dæmi um hvernig þau geta leyst verkefni vikunnar. Þessa vikuna áttu þau að hægelda eitthvað þannig að ég ákvað að hægelda nautakjöt sem ég hafði keypt á afslætti. Svo varð þetta bara það gott að ég þurfti að deila þessu. Þessi loka er engu síðri köld þannig ég ætla að deila bæði hvernig hægt er að gera hana frá grunni og úr afgöngum.

Hráefni

Chimichurri

• Ólífuolía 1 dl

• Eplasídersedik 2 msk (það má nota líka rauðvíns- og hvítvínsedik)

• Fersk steinselja 1 dl

• Hvítlaukur 4 geirar

• Rautt chili 1 stk

• Oregano 1 tsk

• Salt 1 tsk

• Pipar 1 tsk

Hvítlaukssósa

• Grísk jógúrt 2 dl

• Hvítlaukur 4 geirar

• Ólífuolía 2 msk

• Laukduft 1 tsk

• Salt, pipar og msg eftir smekk

Kjöt

• Afgangar af nautakjöti sem hefur setið á bekknum í 20 mín

eða

• Nautakjöt eldað eftir smekk - ég eldaði kjötið í 8 klst í 65°C heitum ofni með rósmarín, timían, hvítlauk og smjöri

Brauð eftir smekk - ég bakaði súrdeigsbrauð

Annað á lokuna

• Klettasalat

• Dijon sinnep

• Salt og pipar eftir smekk

Aðferð

1. Eldið kjötið

2. Útbúið sósurnar og leyfið þeim að standa eins lengi og þið hafið kost á.

3. Skerið chilið, hvítlaukinn og steinseljuna í chimmichurri smátt og blandið öllu saman.

4. Merjið hvítlaukinn og blandið saman við restina í hvítlaukssósuna

5. Smjörsteikið brauðið á pönnu uppúr smjöri (ég notaði pönnuna sem kjötið hafði verið í) eða ristið brauðið.

6. Búið til loku með öllum hráefnunum og njótið