Saltkaramellukaka

Það hefur verið ákveðinn vani hjá mér að koma með köku í vinnuna í hvert skipti sem ég hætti í einhverri sumarvinnunni. Samstarfsfólk mitt hefur þá verið í hlutverki tilraunadýra (þó ég myndi segja að flestar kökurnar hafi verið frábærar). Þessa köku gerði ég eitt sumarið þegar ég var með karamellu á heilanum. Ég hugsaði síðan ekkert um hana í nokkur ár fyrr en ég hitti gamlan samstarfsfélaga um daginn og hann minntist strax á þessa köku og hvað hún hafði verið góð. Vandamálið var hinsvegar að ég hafði ekkert skrifað uppskriftina niður þannig að ég þurfti að reyna að endurgera kökuna frá minni. Það heppnaðist og var kakan síðan dæmd góð þegar ég fór, jú auðvitað, með hana í vinnuna.

Hráefni

Kakan

• Egg 6 stk

• Sykur 200g

• Púðursykur 250g

• Vanilludropar 1 tsk

• Hveiti 375g

• Lyftiduft 3tsk

• Mjólk 100g

• Smjör 150g

Kremið

• Mjúkt smjör 400g

• Flórsykur 200g

• Saltkaramellusósa 100g

• Saltkaramellukurl 1 poki

Aðferð

1. Þeytið saman egg og sykur ásamt vanilludropum

2. Blandið hveitinu ásamt lyftiduftinu varlega saman við með sleikju og í kjölfarið mjólkinni og bræddu smjöri

3. Skiptið í tvö 20-25cm form og bakið við 180°C í 30-35 mínútur

4. Takið kökuna úr ofninum og kælið áður en kremið er sett á

5. Gerið kremið með því að þeyta saman mjúkt smjörið og flórsykur og bætið síðan saltkaramellusósunni útí og þeytið áfram þar til hún hefur blandast vel saman við

6. Blandið saltkaramellukurlinu saman við með sleikju og setjið kremið á kökuna